الجنة وما فيها من النعيم

إِنَّ الْحَمْدَ لِلَّهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَعُوذُ بِاللهِ مِنْ شُرُورِ أَنْفُسِنَا وَسَيِّئَاتِ أَعْمَالِنَا مَنْ يَهْدِ اللهُ فَلاَ مُضِلَّ لَهُ وَمَنْ يُضْلِلْ فَلَنْ تَجِدَ لَهُ وَلِيًّا مُرْشِدًا ، وَأَشْهَدُ أَنْ لاَّ إِلَهَ إِلاَّ اللهُ وَحْدَهُ لاَ شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ ، اللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ صَلَّى اللهُ عَلَيْهِ وَسَلَّمَ وَعَلَى آلِهِ وَصَحْبِهِ وَمَنِ اهْتَدَى بِهَدْيِهِ إِلَى يَوْمِ الدِّينِ وَبَعْدُ:

فَيَاعِبَادَ اللهِ يَقُولُ الْحَقُّ تَبَارَكَ وَتَعَالَى فِي الْقُرْآنِ الْكَرِيمِ:
إِنَّ اللَّهَ اشْتَرَى مِنْ الْمُؤْمِنِينَ أَنفُسَهُمْ وَأَمْوَالَهُمْ بِأَنَّ لَهُمْ الْجَنَّةَ يُقَاتِلُونَ فِي سَبِيلِ اللَّهِ فَيَقْتُلُونَ وَيُقْتَلُونَ وَعْدًا عَلَيْهِ حَقًّا فِي التَّوْرَاةِ وَالإِِْنجِيلِ وَالْقُرْآنِ وَمَنْ أَوْفَى بِعَهْدِهِ مِنْ اللَّهِ فَاسْتَبْشِرُوا بِبَيْعِكُمْ الَّذِي بَايَعْتُمْ بِهِ وَذَلِكَ هُوَ الْفَوْزُ الْعَظِيمُ.

Innalhamda lillāhi nahmaduhu wa nastaīnuhu wa nastagfiruh, wa na’ūdubillāhi min shurūri anfusinā wa sayyiāti a’mālinā, man yahdihillāhu falā mudhillalahu, wa may yudhlil falan tajida lahu waliyyan murshidā, wa ash’hadu allā ilāha illallāhu wahdahu lā sharīka lahu, wa ash’hadu anna Mohammadan abduhu wa rasūluh, Allāhumma salli wa sallim wa bārik alā Mohammadin sallallāhu alayhi wa salallama wa alā ālihi wa sahbihi wa manihtadā bihad’yihi ilā yawmidd dīn wa ba’du:

Fayā ibādallāh, Yaqūlul Haqqu Tabāraka wa Ta’ālā fil Qur’ānil Karīm:

Innallahas tarā minal mu’minīna anfusahum bianna lahumul jannatu, yuqātilūn fī sabīlillāhi fayaqtulūna wa yuqtalūn wa’dan alayhi haqqan fit tawrāti wal injīl wal qur’ān, wa man awfā bi’ahdihi minallāhi, fastashirū bibay’ikumulladī bāya’tum bihi, wa dālika huwal fawzul adhīm.

Manga oripn o Allāh, aya bandingan tano imanto na so ptharoon a sorga ago so madadalm on a manga balas o Allāh (سبحانه وتعالى) ko oripn iyan a miangongonotan on ko katatago iyan ko doniya.

Giankai a sorga na skaniyan i rinayagan ago pimbolawasan o limo o Allāh (سبحانه وتعالى) a mapmbagian o manga oripn iyan a miaratiaya on, go skaniyan i aarapn o manosia a ron makapagingd ko oriyan o kapatay niyan.

Giankanan a sorga a babantakn tano na aya ingaran iyan ko basa Arab na so Al Jannah, a aya maana niyan ko basa na so asinda a pd sa korma odi na manga pamomolan, a giankoto a basa na phoon ko galbk a Janna a aya maana niyan na somiapng, sabap sa so asinda na igira miakarimpoong so manga kayo niyan sa mamamalampak so manga sapak iyan na pkhasapngan iyan so lopa ago so matatago ko atag iyan a go pkharnding iyan so ranti o alongan oba pamantk ko sold iyan. Sabap roo na bithowan o basa arab so sorga sa Jannah.

So pman so mababantak a maana sankanan a sorga a aya tano bandingan imanto na skaniyan so ingd a so inithiakap o Allāh (سبحانه وتعالى) ko manga oripn iyan a miamananggila ko lalangan iyan, sa balas iyan kiran ko kapiya o paratiaya iran ago so manga galbk iran a manga pipia.

Giankanan a kasorgaan na madakl a piakanggolalan on o Qur’an a manga ingaran a pd on so: Al Jannatul Ma’wā (so sorga a khadrangan) Jannatu Adn (so sorga a khatatap on so taw nian), Dārul Khulūd (so ingd a tatap) Jannatul Firdaws (so sorga a maporo), Dārus Salām (so ingd o kalilintad), Dārul Muqāmah (so ingd a babalingan), Jannātun Na’īm (so sorga a limo). Al Maqāmul Amīn (so ingd a somasarig a lomilintad).

Miaaloy ko Qur’an a so blangan iyan na so dn so blangan o manga langit ago so lopa.

Miapanothol a so Nabi na iniiza on so darpa o naraka amay ka so sorga na aya kablang iyan na so manga langit ago so lopa? Na aya inismbag iyan na:

Miasotisoti so Allāh (سبحانه وتعالى) , anda so kagagawii igira miakaoma so kadawndaw.

Manga oripn o Allāh, gianan so sorga a aya kiniropaan on o Rasūlullāh (صلّى الله عليه وسلّم) ko madadalm on a kamapiayan o oripn, na skaniyan so daa mata a ba on miakailay, ago daa tangila i ba on miakan’g, ago da pn mititik sa poso a manosia.

Manga oripn o Allāh, aya manga taw ko sorga na so taw a miaratiaya a initindg iyan so manga simba ko Allāh (سبحانه وتعالى) ago mipharangay sa manga pipiya. Pitharo o Allāh (سبحانه وتعالى) a:

إِنَّ اللَّهَ اشْتَرَى مِنْ الْمُؤْمِنِينَ أَنفُسَهُمْ وَأَمْوَالَهُمْ بِأَنَّ لَهُمْ الْجَنَّةَ يُقَاتِلُونَ فِي سَبِيلِ اللَّهِ فَيَقْتُلُونَ وَيُقْتَلُونَ وَعْدًا عَلَيْهِ حَقًّا فِي التَّوْرَاةِ وَالْإِنجِيلِ وَالْقُرْآنِ وَمَنْ أَوْفَى بِعَهْدِهِ مِنْ اللَّهِ فَاسْتَبْشِرُوا بِبَيْعِكُمْ الَّذِي بَايَعْتُمْ بِهِ وَذَلِكَ هُوَ الْفَوْزُ الْعَظِيمُ.

Mataan a so Allah na piamasa niyan ko miamaratiaya so manga ginawa iran ago so manga tamok iran sa rk iran so sorga, a giisiran makithidawa sa lalan ko Allah, sa pphakabono siran (sa ridoay a kafir) ago pkhabono siran (pkhasahid siran) kapasadan rkaniyan a Allah a bnar a misosorat ko Tawrah ago so Injil ago sii ko Qur’an, na sa taw a itoman iyan so kapasadan iyan ko Allah, na kababayaan iyo so dagangan iyo a so piphasa niyo skaniyan, a gioto na skaniyan so kapagontong a mala (At Tawbah 111).

So manga limo a madadalm ko Sorga:

Iniropa o Allāh (سبحانه وتعالى) so sorga sa mataan a so manga limo a madadalm on na tatap ago lalayon, na so kapipiya ginawa on na di dn khapos, ago langowan a madadalm on a mapia na daa isipan iyan a tanto a madakl.

So manga lawas a ig iyan na khizosolapay, adn a manga lawas a ig on a tabang a ig, a di kharmbis, go adn a lawas a ig on a pd sa gatas a di dn khaalin so taam iyan, ago adn a lawas a ig on a arak a ragiray sa bakrng a di phakaibg, go adn a lawas a ig on a tnb a linang.

Giankoto a manga lawas a ig na pphamanoga ko kababaan o manga marigay, ago kadadalman sa pizoson a manga onga a sapad ago manga sapo a papanok.

So manga rizqi ko sorga na makapzasapowa sa manga bontal ogaid nambidabida sa taam ko kapiya niyan. Pitharo o Allāh (سبحانه وتعالى) a:

وَبَشِّرْ الَّذِينَ آمَنُوا وَعَمِلُوا الصَّالِحَاتِ أَنَّ لَهُمْ جَنَّاتٍ تَجْرِي مِنْ تَحْتِهَا الْأَنْهَارُ كُلَّمَا رُزِقُوا مِنْهَا مِنْ ثَمَرَةٍ رِزْقًا قَالُوا هَذَا الَّذِي رُزِقْنَا مِنْ قَبْلُ وَأُتُوا بِهِ مُتَشَابِهًا وَلَهُمْ فِيهَا أَزْوَاجٌ مُطَهَّرَةٌ وَهُمْ فِيهَا خَالِدُونَ.

Go panothol anka ko siran oto a miamaratiaya ago minggalbk sa manga pipia a mataan a adn a bagian iran a manga kasorgaan a pphamanoga ko kababaan iyan so manga lawas a ig, a oman siran on rizkhian sa pd sa onga a sapad a pagpr na tharoon iran a giai so inirizki rkitano sa miaona, sa iniidang kiran sa makaphlagilagid sa bontal, go adn a bagian iran ko sorga a manga karoma a manga soti, ago siran ko sorga na tatap siran on sa dayon sa dayon. (Al Baqarah 25)

Manga oripn o Allāh, aya manga nditarn ko sorga na manga sotra a pd sa bayobayog ago manga kakapal, na aya manga imbolawan iran on na manga bolawan ago manga montia.

Skaniyan a sorga na iniropa sa manga bilik a so kaporoan iyan na bilik a pananagombalayin a so manga lawas a ig na pphamanoga ko kababaan iyan.

So manga taw ko sorga ago so manga karoma iran na madadalm siran sa manga sironsironga a khiddrang siran ko manga kantir. So manga karoma iran a manga bai a miamakasorga na pagadnn siran o Allāh (سبحانه وتعالى) sa salakaw a kaadn a manga babay a da pangatatamaki a manga ngongoda i omor, ago so Allāh (سبحانه وتعالى) na magadn sa manga midadari a manga tataid a maphamangaroma o taw a phakasorga a datar siran kon o kapoti o orak a manok a matotonkop a manga soti a di siran khaoma a haydh ago nifas, a tanto a manga pipia i parangay ko manga karoma iran a manga mama.

So manga taw ko sorga na plowasn o Allāh (سبحانه وتعالى) so kadnki ago so kasiig ko manga poso iran a magariari a khiddrang siran ko manga kantir. Da dn a dokaw a khisogat kiran ko sorga, ago di siran dn phakaliyo ago di siran phakaawa ko sorga sa dayon sa dayon.

Da dn a khan’g iran ko sorga a sowara a marata, aya bo a pkhan’g roo na so podipodi ko Allāh (سبحانه وتعالى) ago so salam o manga malaikat ko miamaratiaya ago so giiran kazasalama ago so manga pd iran a manga taw ko sorga. Pitharo o Allāh (سبحانه وتعالى) a:

Go so manga malaikat na pphamanold kiran ko oman i pinto, sa giiran tharoon a salam rkano sabap ko nganin a pizabar iyo. Na miakapiapia so ingd a khabolosan a so sorga (Ar Ra’d 23).

Manga oripn o Allāh, miaaloy ko hadith a pianothol o Bukhari ago so Muslim ago so Tirmidi a so Nabi (صلّى الله عليه وسلّم) na pitharo iyan a:

Aya paganay a lompokan a phakasold ko sorga na makaproropaan ko bontal o olan ko kagagawii a kiambiring iyan, oriyan iyan na makatondog kiran so datar o bitoon a masigay sii ko langit ko kasindaw, a siran oto na di siran phakatiti ago di siran phakaodo, ago di siran phanoda ago di siran phakasnga sa manga langog, a aya manga salday ran na bolawan, na aya ating iran na so kastori, na aya ikhakamotan iran na so mamot a borok (al Alwah), a aya manga karoma iran na so manga midadari, sa so kiaadna kiran na datar o bontal o ama iran a Adam a nm polo hasta a kaporo iran.

Manga oripn o Allāh, so manga limo ko sorga na maporo a di so kiropaan on o pamikiran, sa so kipropaan tano ron na matag abayabayan ko manga limo ko donia.

Pianothol o Bukhari a miakapoon ko Abu Hurayrah a so Nabi na pitharo iyan a: Pitharo o Allāh (سبحانه وتعالى) a: Inipagtad akn ko manga oripn akn a manga salih a nganin a da dn mailay a mata ago da man’g a tangila ago da mititik sa poso a manosia (so kapiya niyan) batiaa niyo o khabayai niyo so katharo o Allāh (سبحانه وتعالى) a:

فَلاَ تَعْلَمُ نَفْسٌ مَا أُخْفِيَ لَهُمْ مِنْ قُرَّةِ أَعْيُنٍ

Daa ginawa a ba niyan katawi so nganin a piagma kiran a pd sa limo a iphakapiaa ginawa. (As Sajdah 17).

Da dn a plagidan o limo ko sorga ago so limo ko donia inonta bo ko manga ngaran, ogaid na so kamamataani ron na da dn a ba iran plagidi.

Manga oripn o Allāh, aya pithamanan a mapia a limo ko sorga na so kailaya o oripn ko Kadnan iyan a Rabbul Alamin, ago so kipmbitiarain iyan on, ago so kakhakowaa niyan ko kasosoat iyan a Rabbul Alamin. Pitharo o Allāh (سبحانه وتعالى) a:

وُجوُهٌ يَوْمَئِذٍ نَاضِرَةٌ , إِلَى رَبِّهَا نَاظِرَةٌ

Adn a manga paras sa alongan oto a maka-lalangas, a sii ko Kadnan iyan na phagilayin iyan (Al Qiyamah 22).

Miakapoon ko Suhayb a mataan a so Nabi na pitharo iyan a: Amay ka makasold so manga taw o sorga ko sorga, na tharoon o Allāh (سبحانه وتعالى) a: Ba adn a khabayaan iyo a shayi a ipagoman akn rkano? Na tharoon iran a: Ba nka da pakapotia so manga paras ami? Ba kami nka da pakasolda ko sorga? Ba kami nka da pakalidasa ko naraka? Na isogo o Allāh (سبحانه وتعالى) a misayat so rnding, na daa minibgay kiran a shayi a lawan a pkhababayaan iran a ba niyan kalawani so kailaya iran ko Kadnan iran. Oriyan iyan na biatiya iyan so katharo o Allāh (سبحانه وتعالى) a:

لِلَّذِينَ أَحْسَنُوا الْحُسْنَى وَزِيَادَةٌ

Bagian o siran oto a miphiapia so pithamanan a mapiya (a so sorga) ago adn a oman iyan (a so kakhailaya iran ko Allah).

Miakapoon ko Jarir Bin Abdillah a pitharo iyan a: Liangag o Rasūlullāh (صلّى الله عليه وسلّم) so olan ko kagagawii a kiambiring iyan na pitharo iyan a: Matatankd a khailay niyo so Kadnan iyo (ko sorga) sa sandng a kailay sa datar o kapkhailaya niyo sankai a olan, sa di kano dn pzanka ko kakhailaya on, na amay ka khagaga niyo a di kano makalpas sa sambayang ko da pn kasbang o alongan ago sii ko da niyan pn kasdp na nggolawlaa niyo. Oriyan iyan na biatia iyan so:

وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ الْغُرُوبِ

Go zambayang ka ko da pn kasbang o alongan ago sii ko da niyan pn kasdp (Qaf 39).

So pman so kailaya ko Allāh (سبحانه وتعالى) o oripn sii ko doniya na da dn manggolawla. Piangni o Musa [a.s.] a mailay niyan so Kadnan iyan, na so kiaphayag o tihaya o Allāh (سبحانه وتعالى) ko lopa na minilamps so Musa a pipinsann sa da niyan dn magaga o ba niyan mailay so Allāh (سبحانه وتعالى) .

Manga oripn o Allāh, so sorga na ingd a tatap a di dn khada ago daa kaposan iyan, sa datar oto mambo so naraka a da dn a taman iyan sa so manga taw sankanan a dowa a darpa na tatap siran on a da dn a ba iran on kakhada sa dayon sa dayon, sa da dn a kapatay roo ago daa kadadas on.

Pd a ropaan o sorga ago so naraka a so sakataw a taw a pithamanan a maroromasay ko doniya na o saldn ko sorga sa makaisa na da dn a katadman iyan a karomasayan a kiasagadan iyan ko doniya, na so mambo so pithamanan a mindayadaya ko doniya a somiawit on na o saldn ko naraka sa sasindot on na da dn a katadman iyan a mapia a kiasagadan iyan ko donia, gianan i tarotop a ropaan o sorga ago so madadalm on a limo, ago so naraka ago so madadalm on a siksa ko kiniropaan on o sabdan o Rasūlullāh (صلّى الله عليه وسلّم) .

Manga oripn o Allāh, pangnin tano ko Allāh a balowin tano niyan a pd ko manga taw a pphamakin’gn iran so katharo na phagonotan iran so lbi ron a mapiya.

وَأَقُولُ قَوْلِي هَذَا وَأَسْتَغْفِرُ اللهَ لِي وَلَكُمْ وَلِسَائِرِ الْمُسْلِمِينَ مِنْ كُلِّ ذَنْبٍ فَاسْتَغْفِرُوهُ إِنَّهُ هُوَ التَّوَّابُ الرَّحِيمُ

Wa aqulu qawli hada wa astagfirullaha li wa lakum wa lisairil Muslimin min kulli dambin fastagfiruhu innahu Huwat Tawwabur Rahim.

KHUTBAH A IKA DOWA

(MANGA DUWA'A)

Alhamdulillāhi rabbil ālamin, wassalātu was salāmu alā rasulihil karīm Mohammadin Bin Abdillāh, wa alā ālihi wa sahbihi ajmaīn.

Manga oripn o Allāh, mangndod tano ko Allāh ago magapas tano ron sa mamangni tano ron sa rila.

Ya Allāh, mapapadalm kami imanto sa ngaki a walay ngka sa pantag sa giiami rka kazoasoata na rilai kami ngka ago rila ingka so manga loks ami ago rila ingka so kadandan o manga muslim so miyamatay kiran ago so oyagoyag kiran.

Ya Allāh, pakabagr angka so paratiyaya mi rka ago ompiya ingka so btad ami sa baloy angka so imanto ami a mapiya a di so kagai ami, na so mapita ami na mapiya a di so imanto ami.

Ya Allāh, kalimoon ka mingka ago lindinga kami ngka sa awata kami ngka ko manga sakit ago piya angka so pphangasasakit rkami, ago pakabayad angka so makambabayadan rkami, na pakakhawasa angka so manga mrmr rkami, na pakandiyakat angka so manga kawasa rkami, na timo angka so kasasagomparak ami, na bagr angka so malobay rkami, na ayon ingka so manga dato ami sa aya manggalbk iran na so kamapiyaan ami ago so Islam.

Ya Allāh, pakadaag angka so ronda o Islam sa madaag ami so manga ridoay o agama ngka sa tatap angka so manga palo ami sa maydan ago bgan ka rkami a limo a makapagintaw kami ko agama ngka ago mapakatindg ami so parinta Islamiyyah ko manga poso ami a go sii ko manga ingd ami.

Ya Allāh, tabangi kami ngka ko kaptadmi ami rka ago so kapiya o kapzimbaami rka.

Ya Allāh, pakiilayin ka rkami so bnar na dograan ka rkami so kaonoti ami ron, na pakikilalaan ka rkami so batal, na dograan ka rkami so kapananggilai ami ron.

رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ.

Ya Allāh, bgi kami ngka ko doniya sa mapiya ago sii ko akhirat sa mapiya ago lindinga kami ngka ko siksa ko naraka.

Ya Allāh, kalimoon ka so Nabi ami a Muhammad ago so manga pamiliya niyan ago so manga sahabah niyan sa kalangolangon iran. Wal Hamdulillahi Rabbil Alamin. Aqimus salah…..