Pangnal ko Sūrah

Aya bandingan ankanan a sūrah na so tarotop a kiathpda sa lantay o dowa a paratiaya a so kakhakafir ago so kapangongonotan sa da dn a ba iran kapthmowan a okit ko kaoyagoyag ko doniya.

So Muslim na rk iyan so agama niyan na so kafir na rk iyan so agama niyan, sa da a ba on kaplbolbod sa ba makazolbiya sa di dn pthapi sa datar o lana ago so ig a di dn khaparo o ba makazaog sa maisaisa.

Sii ko oriyan anan na mianagompot so kiapridoay ko paratiaya sa so kafir na piakasndad iyan so ringasa iyan ko Muslim, na so Muslim na piakabagr iyan so kaphantang ko di niyan kapokas ko goliling o agama niyan sa mianinggaposan so btad sa rk o Islām.

Tomioron sa Makkah, a aya kadakl a yat iyan na 6, tomioron ko oriyan o Sūrah al Mā’ūn.

So Hadīth a Manonompang on:

Miatankd ko Sahīh Muslim a miakapoon ko Jābir a so Rasūlullāh [s.a.w] na biatia iyan ankai a Sūrah, ago so Sūrah al Ikhlās ko dowa a rakaat a sambayang ko kathawaf, go sii ko Sahīh Muslim a hadīth o Abū Hurayrah a so Rasūlullāh [s.a.w] na biatiya iyan siran ko sambayang a zobo, sa adn a Hadīth a inaloy niyan a skaniyan na khatimbangan iyan so isa ko pat bagi ko Qur’ān. Go pianothol o at Tabarānī a so Rasūlullāh [s.a.w] na igira miniga ko igaan iyan na batiaan iyan ankai a Sūrah sa taman sa mapos. Go miakapoon ko al Hārith Bin Jabalah a: Pitharo akn a: Hay Rasūlullāh [s.a.w] Pangndao ako nka sa nganin a ptharoon akn ko kaphakatorog akn, na pitharo iyan a: Amay ka magiga ka ko kagagawii na batiya anka so Sārah al Kāfirūn ka mataan a skaniyan na kaangias ko kapanakoto. So Allāh i lbi a Matao.