Pangnal ko Sūrah

Giankai a sūrah na skaniyan i tomadng o paratiaya a kapakaisaisaa ko Allāh (tawhīd) sa iniropa niyan so Allāh ko maliwanag a ropaan iyan, ka an mada so manga pakaiza on o manga kafir sa di ran on kakikilalaa o antawa a skaniyan.

Tomioron sa Makkah, a aya kadakl a ayat iyan na 4, tomioron ko oriyan o Sūrah an Nās.

So Hadīth a Manonompang on:

Miakapoon ko Ubayyi Bin Ka’b a so manga mushrik na pitharo iran ko Nabī [s.a.w] a: Hay Mohammad salsilaan ka rkami so bangnsa o Kadnan ka? Na piakatoron o Allāh ankoto a sūrah.

So Kapakallbi Niyan:

Hadīth a miaaloy a pianothol o al Bukhārī a miakapoon ko Ā’ishah a: So Nabī [s.a.w] na somiogo sa salompok a ronda na so olowan iran na pmbatiaan iyan kiran ko sambayang iran so Sūrah al Ikhlās na gowani a makabaling siran na inaloy ran oto ko Nabī [s.a.w] na pitharo iyan a izaan iyo ron o ino niyan oto giinggolawlaa, na iniiza iran on, na pitharo iyan a: Kagiya skaniyan na sifat o Allāh a Makalimoon na pkhababayaan akn a kapmbatiaa ko ron, na pitharo o Nabī [s.a.w] a panothola niyo ron a mataan a so Allāh na pkhababayaan iyan skaniyan.

Pitharo o al Bukhārī a miakapoon ko Abū Sa’īd [r.a] a pitharo o Rasūlullāh [s.a.w]. ko manga Sahābah niyan a: Ba di khagaga o isa rkano a kabatiaa niyan ko isa ko tlo bagi ko Qur’ān sa isa a kagagawii? Na miakargn oto sii kiran, na pitharo iran a: Antaa rkami i phakagaga san hay Rasūlullāh [s.a.w] na tig iyan a: So Qul Huwallāhu Ahad, na (khatimbang iyan) so isa ko tlo bagi ko Qur’ān. Madakl pn a manga Hadīth a salakaw san a makanggogonanao sa kala i pahala a ankai a Sūrah.

So Kipamolongn on:

Pitharo o al Bukhārī a miakapoon ko Ā’ishah, a so Nabī [s.a.w] na igira domiarpa ko igaan iyan ko oman kagagawii na timoon iyan a palad a lima niyan na iiyop iyan on ago batiaan iyan ankai a Sūrah ago so Sūrah al Falaq ago so Sūrah an Nās (a gianan so dowa a lindongan) oriyan iyan na isapo niyan a palad a lima niyan ko langwan a khakawa iyan ko lawas iyan sa ipoon iyan sa olo niyan ago sa paras iyan ago sa matatampar sa hadapan iyan sa makatlo niyan oto makasoy.